Friday, January 14, 2011

கடந்த வருடத்தில் மீண்டும் ஒரு பயணம்...........

அனைத்து அன்பு நெஞ்சங்களுக்கும் எனது இதயங்கனிந்த இனிய போகிப்பண்டிகை பொங்கல் மற்றும் உழவர்தின நல்வாழ்த்துக்கள்

திரும்பிப் பார்க்கிறேன்” எனது கடந்த ஆண்டு நினைவலைகளின் நிகழ்வுகளை பகிர்ந்துகொள்ள தொடர்பதிவுக்கு அழைத்த ரோஜா பூந்தோட்டம் அவர்களுக்கும், எங்கள் சிங்கை குரூப்ஸின் தலைவர் மதிப்பிற்கும் மரியாதைக்குரிய திரு.பட்டாபட்டி ஐயா அவர்களுக்கும் எனது மனமார்ந்த நன்றியை தெரிவித்துக்கொள்கிறேன்.

சிங்கபுரத்திற்கு வந்து சரியாக சென்ற வருடத்தோடு (2010) மூன்று ஆண்டுகள் நிறைவு பெற்று விட்டன. இந்த மூன்றாண்டுகளில் சில மறக்கமுடியாத நிகழ்வுகளும், வருத்தங்களும், மகிழ்ச்சிகரமான தருணங்கள் என்று மாறி மாறி கடந்து சென்றாலும் சென்ற வருடம் (2010) கொஞ்சம் சிறப்பாகவே அமைந்தது. இந்த வருடத்தில் நடந்த சில முக்கிய நிகழ்வுகள் என்னை மிகவும் மகிழ்ச்சியில் ஆழ்த்தியது. (எனது படிப்பு, வேலை உட்பட)

டந்த வருடத்தில் முதல் பாதி இயல்பான நிகழ்வுகளில் பயணித்தாலும் கடைசி ஆறு மாதங்கள் சிறப்பாகவே அமைந்தது. பதிவுலகத்துக்கு வந்ததும் கடந்த வருடந்தான் பதிவுலகத்தில் நீண்ட கால வாசகனாக இருந்தாலும் வலைத்தளம் தொடங்கி எழுத ஆரம்பித்தது ஜூலை மாதம் 9 ந்தேதி ஒரு சிறிய கணினிக் கவிதையின் அறிமுகத்தோடு பதிவுகள் எழுத ஆரம்பித்தேன். இதோடு நான் படித்த கற்றுக்கொண்ட தகவல்களையும் பதிவுகளில் பகிர்ந்து வருகிறேன் இது நண்பர்களுக்கு எந்தளவிற்கு பிடிக்கிறதோ பயனுள்ளதாக இருக்கிறதோ என்று தெரியவில்லை ஆனால் சிறந்த நண்பர்களை பெற்றுத் தந்துள்ளது இந்த பதிவுலகம் இது போதும். நண்பர்கள் அனைவருக்கும் இந்த தருணத்தில எனது மனமார்ந்த நன்றியினைத் தெரிவித்துக்கொள்கிறேன்.

மீபத்தில் ஊரிலிருந்து எனது தமிழாசிரியர் பதிவுகளை படித்துவிட்டு போன் செய்து பாராட்டியது ரொம்ப சந்தோஷமாகவும் பெருமையாகவும் இருந்தது. முக்கியமாக வானம் வசப்படுமே வரலாற்று நாயகர்களின் தொகுப்பை படித்துவிட்டு மனதார பாராட்டினார். இதுபோன்ற வரலாற்று நாயகர்களின் தகவல்களை இன்றைய இளைஞர்களும் மாணவர்களும் அவசியம் தெரிந்துகொள்ள வேண்டும் இன்னும் இதுபோன்ற பல வரலாற்று நாயகர்களின் குறிப்புகளை எழுத வேண்டும் என்று அன்பு கட்டளையிட்டார். கண்டிப்பாக எழுதுகிறேன் ஐயா, இது எனக்கு கிடைத்த மிகப்பெரிய அங்கீகாரமாகவே நினைக்கிறேன். எனக்காக நேரத்தை செலவு செய்து பாராட்டி ஊக்கப்படுத்திய தமிழாசிரியார் ஐயாவுக்கு எனது கோடாணகோடி நன்றியினை அவரின் பொற்பாதங்களில் சமர்பிக்கிறேன்.

செப்டம்பர் மாதம் எனது தங்கையின் திருமணம் நான் எதிர்பார்த்தைவிட சிறப்பாகவே நடந்து முடிந்தது. ஒரு அண்ணனாக அருகில் இருந்து நேரில் திருமணத்தை பார்த்து வாழ்த்த முடியவில்லையே என்ற குறையைதவிர மற்றபடி சிறப்பாகவே நடந்து முடிந்தது. இதற்கு ஊரில் உள்ள எனது நண்பர்களின் உதவிகள் முக்கியகாரணம், நான் வரமுடியவில்லை என்று தெரிந்ததும் திருமண வேலைகள் அனைத்தயும் கடைசிவரை இருந்து சிறப்பாக செய்தனர் அவர்களுக்கு இந்த நேரத்தில் எனது நன்றியைத் தெரிவித்துக்கொள்கிறேன்.

ஆனால் எனது ஒரே தங்கையின் திருமணத்தை நேரில் சென்று பார்க்க முடியவில்லை என்ற குறை இன்றும் என் மனதை உறுத்துகிறது அதற்கு எனது படிப்பும் ஒரு காரணமாக இருந்தது. ஆம் சரியாக இந்த மாதத்தில்தான் நான் படித்துகொண்டிருந்த நெட்வொர்க்கிங் படிப்பான CCNA தேர்வு இருந்ததால் என்னால் திருமணத்திற்கு ஊருக்கு வரஇயலவில்லை.

க்டோபர் மாதம் சிங்கப்பூர் ITE யில் CCNA தேர்வில் சிறப்பாக வெற்றிபெற்று சான்றிதழ் வாங்கிய கையோடு நிறுவனத்தில் பணி உயர்வு சம்பள உயர்வு என்று தொடர்ந்து மிகவும் சந்தோஷமான நிகழ்வுகள் நடந்தன. நான் விரும்பிய கணினித்துறையின் வன்பொருள் பொறியாளர் மனதுக்கு பிடித்த வேலை மனநிறைவான சம்பளம் பழகுவதற்கு இனிமையான உடன்பணிபுரியும் நண்பர்கள் என்று எனது வேலையும் சிறப்பாகவே சென்றுகொண்டிருக்கிறது. இப்போது Senior System Administrator ஆக எனது பொன்னான பணியை தொடர்ந்து வருகிறேன்... ஹிஹிஹி.

ருடத்தின் கடைசிமாதம் (டிசம்பர்) இன்னும் சில இனிய நிகழ்வுகள் நடந்தன. ஆம் இந்த மாதத்திலதான் சிங்கைகுரூப்ஸின் (பதிவர்கள்) நண்பர்களான வைகை வெறும்பய மற்றும் எங்கள் ஊரைச்சேர்ந்த அண்ணன் சி.கருணாகரசு அவர்களையும் சந்திக்க நேர்ந்தது மிகவும் சந்தோஷமாக இருந்தது அந்த சந்திப்பு. சந்திப்பின்போது பதிவுலக சார்ந்த விசயங்கள் மற்றும் தனிப்பட்ட கருத்துக்களை பகிர்ந்துகொண்டோம்.

நாங்கள் சந்திக்கும்போதெல்லாம் எங்க அண்ணன் சிரிப்புபோலீசு போன் செய்து தொல்லை செய்தது மறக்க முடியாத ஒரு நிகழ்வு ஹிஹி... இனிமையாக அமைந்தன சந்திப்புகள். நேரம் கிடைக்கும்போது சந்திப்புகள் தொடர்ந்து வருகிறது இனியும் தொடரும்.... ஆனால் எங்கள் தலைவர் ஐயா பட்டாபட்டியைதான் இன்னும் சந்திக்க முடியவில்லை எப்போது கேட்டாலும் ஆணி அதிகம் என்று கூறி தப்பித்து வருகிறார். எப்படியும் நான் ஊருக்கு வருவதற்குள் சந்தித்து தரிசனம் பெற்று விடுவேன் என்று நினைக்கிறேன்.. அதற்கும் தலைவர்தான் மனது வைக்கனும் ஹிஹி

சிங்கைக்கு நியாயமான ஆசைகளோடும் கொஞ்சம் கனவுகளோடும் வந்து சேர்ந்தேன் இந்த மூன்றாண்டுகளில் ஒவ்வொன்றாக நடந்துகொண்டிருப்பது என்பது சந்தோசஷமாகவும் மகிழ்ச்சியாகவும் உள்ளது ஒரு சில குறைகளைதவிர்த்து (பணத்திற்காக உறவுகளையும் நண்பர்களையும் பிரிந்து இருப்பதுதான்) இந்த ஆண்டின் தொடக்கம் மிகச்சிறப்பாகவே அமைந்துள்ளது இதுபோல தொடர்ந்து இனி எதிர்வரும் நாட்களும் இனிய நிகழ்வுகளாகவே அமையும் என்றே நினைக்கிறேன் பார்க்கலாம்........

சிங்கைக்கு போய்ச் சேர்ந்ததுமே

நெத்தியில திருநீறுபூச நீடுவாழ்க என்று வாழ்த்த
புத்திமதியும் கொஞ்சம் பொறுப்போடு எடுத்துரைக்க
சித்திரங்கள் பேசுமந்தச் சித்திரைமா தம்தன்னில்
நித்திரைகள் களைந்தோட நெடுந்தூரப் பயணமானேன்

ஓட்டைவழி மழைத்தண்ணீர் ஒழுகியுள்ளே வந்தாலும்
ஓட்டுவீட்டின் உள்ளேஓர் ஓலைப்பாய் விரிப்பினிலே
கூட்டுக் குடித்தனமாய் கூடிவாழ்ந்த காலமதில்
காட்டியதாய் அன்புக்கு கடுகளவும் பஞ்சமில்லை

சிட்டாட்டம் பறந்துநான் சிங்கையைப்போய்ச் சேர்ந்ததுமே
வீட்டினையே நெனச்சு ஏங்கி விழிகசக்கி நிக்காமல் 
சாட்டையது சுழற்றிவிட்ட பம்பரத்தை போலுழைச்சுக்
கட்டுப்பாடோடிருந்து கடனெல்லாம் அடைச்சிடனும்

இல்வாழ்க்கைத் துணையாகி என்வீடு வந்தபின்னும்
தாய்வீட்டுப் புடவைக்கே தவங்கிடக்கும் நிலைபோக்க
என்னவளாம் ராணிக்கு ஏராளப் புடைவைகளை
கண்ணுபடும் அளவுக்கு கணக்கின்றி அனுப்பிடனும்

கருவாச்சி மீனாட்சி மீனாப்பு என்றைழைக்கும்
கருப்புவைரம் என் தாத்தா கட்டழகர் திருப்பதிக்கு
தங்கநிறக் கடிகாரம் தகதகன்னு மினுமினுக்க
சிங்கையில நான் வாங்கி சீக்கிரமே அனுப்பிடனும்

தப்பாகப் போகாமல் தண்ணி, புகை அடிக்காமல்
அப்பாவுக்கொன்று பின்னர் அவளுக்கோர் கைப்பேசி
அங்கிருந்து உரையாட அடியேனாம் எனக்கு மட்டும்
பொங்கும்நல் அழகோடு புதுமையான கைப்பேசி

இன்னபிற ஆசைகளும் எனக்குள்ளே பொங்கியெழ
கண்மூடித் திறப்பதற்குள் கண்டுவிட்டேன் சிங்கபுரம்
என்னத்த நான்சொல்ல .... இப்ப
வாங்குகிற சம்பளமோ வட்டிக்கே சரியாக
ஏங்குதுங்க என்மனசு எப்ப ஊரு திரும்பலாம்ணு!!!

- கவிஞர் கி.கோவிந்தராசு

*************************************************************

(இந்தக்கவிதை அருமை நண்பர் கவிஞர் கி.கோவிந்தராசுவின் முதல் புத்தக தொகுப்பான வேர்களின் வியர்வை என்ற படைப்பிலிருந்து...)

வெளிநாட்டில் பணிபுரியும் ஒருசில நண்பர்கள் வேண்டுமென்றால் நல்ல வேலையிலும் சம்பளத்திலும் இருக்கலாம். ஆனால் மற்ற ஆயிரமாயிரம் வெளிநாட்டு திறனாய்வாளர்களின் டைரிகுறிப்பு இந்த கவிதையில் உள்ள வரிகளாகத்தான் இருக்கும். எத்தனையோ ஆசைகளோடும் கனவுகளோடும் உறவுகளை பிரிந்து வலிகளை சுமந்துகொண்டு பணிபுரியும் சிங்கை வாழ் நண்பர்களுக்கு இந்தக்கவி வரிகள் ஒரு சமர்ப்பணம்.

ன்னைப்போன்ற வெளிநாட்டில் பணிபுரியும் நண்பர்களின் உணர்வுகளை வரிகளில் வலிகளுடன் பதிவு செய்த நண்பர் கவிஞர். கி.கோவிந்தராசு அவர்களுக்கு எங்கள் சிங்கை குரூப்ஸ் நண்பர்கள் சார்பாக நெஞ்சார்ந்த நன்றியினைத் தெரிவித்துக்கொள்கிறோம்... அவர் மேலும் பல கவிதைத் தொகுப்பினை படைத்து கவித்துறையில் மென்மேலும் சிறக்க எங்கள் வாழ்த்துக்களும் பிரார்த்தனைகளும்....... நன்றி!!

நண்பர்கள் அனைவருக்கு மீண்டும் எனது இனிய பொங்கல் நல்வாழ்த்துக்கள்

பாராட்டுகளை விரும்பாத மனிதன் இல்லை, அது போல தன் குறையை திருத்த மற்றவர்களுக்கு வாய்பளிக்காதவனும் மனிதனே இல்லை, இதைக் கொஞ்சம் புரிந்துகொண்ட சராசரி மனிதன் நான்.தயவுசெய்து தவறுகளை சுட்டிக்காட்டுங்கள் நிறைகளை பகிர்ந்துகொள்ளுங்கள், சின்ன சின்ன அங்கீகாரம் மட்டுமே மனதிற்கும் வாழ்விற்கும் புத்துணர்வு அளிக்கும்.

வாழ்க வளமுடன்
என்றும் நட்புடன்
உங்கள் மாணவன்